بیجنگ (نیوز ڈیسک) چائنا میڈیا گروپ کا شان شی کی صوبائی حکومت اور فوجیان کی صوبائی حکومت کی مشترکہ میزبانی میں 13 واں سلک روڈ انٹرنیشنل فلم فیسٹیول چین کےصوبہ شان شی کے صدر مقام شی آن میں شروع ہوا۔ شان شی کی صوبائی پارٹی کمیٹی کے سیکرٹری اور 13ویں سلک روڈ انٹرنیشنل فلم فیسٹیول کی آرگنائزنگ کمیٹی کے ڈائریکٹر چاؤ ای دے نے فلم فیسٹیول کے افتتاح کا اعلان کیا۔ کمیونسٹ پارٹی آف چائنا کی مرکزی کمیٹی کے شعبہ تشہیر کے نائب سربراہ اور چائنا میڈیا گروپ کے صدرشن ہائی شیونگ نے ویڈیو خطاب کیا۔ مصری نیشنل فلم سینٹر کے ڈائریکٹر احمد صالح نے موجودہ فلم فیسٹیول میں مہمان ملک کی جانب سے تقریر کی۔
اپنی تقریر میں شن ہائی شیونگ نے کہا کہ چائنا میڈیا گروپ کے زیراہتمام ”سلک روڈ منظرنامہ“ نامی چینی فلموں کی بیرون ملک نمائش ”بیلٹ اینڈ روڈ“ کے متعدد شراکت دار ممالک میں کی جا رہی ہے۔ چائنا میڈیا گروپ اندرون و بیرون ملک تمام شعبوں سے وابستہ دوستوں کے ساتھ مل کر نئی شاہراہ ریشم کی کہانیوں کے ذریعے چینی ثقافت کی دلکشی کو اجاگر کرنے اور بنی نوع انسان کے ہم نصیب معاشرے کی تعمیر میں کردار ادا کرنے کے لیے تیار ہے۔
اس سال کے فلم فیسٹیول کو 139 ممالک اور خطوں سے 2,130 فلمیں موصول ہوئی ہیں، جو فیسٹیول کی تاریخ میں ایک نیا ریکارڈ ہے۔ رواں سال چین اور مصر کے درمیان سفارتی تعلقات کے قیام کی 70ویں سالگرہ منائی جا رہی ہے۔ فلم فیسٹیول میں مصر کو مہمان خصوصی ملک کے طور پر مدعو کیا گیا ہے اور ”بیلٹ اینڈ روڈ انیشی ایٹو“ کے تحت فلمی صنعت کی ترقی پر مکالمے سمیت پیشہ ورانہ سرگرمیوں کا اہتمام کیا جائےگا ۔یہ فلم فیسٹیول 23 ستمبر تک جاری رہےگا جبکہ فیسٹیول کے اختتام پر بہترین فلم، بہترین ڈائریکٹر، بہترین اسکرین پلے اور دیگر ایوارڈزکا اعلان کیا جائے گا۔
