کمیونسٹ پارٹی آف چائنا کی مرکزی کمیٹی کے سیاسی بیورو نے 30 جولائی کی سہ پہر قومی دفاع اور مسلح افواج کی جدید کاری کو اعلیٰ معیار کے ساتھ آگے بڑھانے کے موضوع پر اپنا 27واں گروپ اسٹڈی سیشن منعقد کیا۔
سی پی سی کی مرکزی کمیٹی کے جنرل سیکرٹری شی جن پھنگ نے اجلاس کی صدارت کرتے ہوئے زور دیا کہ پندرہویں پانچ سالہ منصوبے کے دوران نئے عہد میں شی جن پھنگ کے چینی خصوصیات کے حامل سوشلسٹ نظریے کی رہنمائی میں مسلح افواج کو مضبوط بنانے سے متعلق نظریات پر جامع عمل درآمد کیا جائے، سیاسی رہنمائی کو مضبوط بنایا جائے، جدت پر مبنی ترقی کو فروغ دیا جائے اور قومی دفاع اور مسلح افواج کی جدید کاری کو اعلیٰ معیار کے ساتھ آگے بڑھایا جائے۔
شی جن پھنگ نے کہا کہ مقررہ مدت کے مطابق عسکری تعمیر کے صد سالہ ہدف کو حاصل کیا جائے اور قومی دفاع اور مسلح افواج کی جدیدکاری کے بنیادی اہداف کے حصول میں فیصلہ کن پیش رفت کی جائے، تاکہ چینی طرز جدیدیت کے ذریعے ایک مضبوط ملک کی تعمیر اور قومی نشاۃ الثانیہ کے عظیم مقصد کے لیے مضبوط تزویراتی ضمانت فراہم کی جا سکے۔
شی جن پھنگ نے کمیونسٹ پارٹی آف چائنا کی مرکزی کمیٹی اور مرکزی فوجی کمیشن کی جانب سے پیپلز لبریشن آرمی کے تمام افسران و جوانوں، مسلح پولیس فورس کے اہلکاروں، فوجی سول ملازمین، ریزرو اہلکاروں اور ملیشیا کو یکم اگست پیپلز لبریشن آرمی کے یوم تاسیس کی مناسبت سے مبارکباد پیش کی۔
اجلاس میں شی جن پھنگ نے اہم خطاب کرتے ہوئے کہا کہ قومی دفاع اور مسلح افواج کی جدیدکاری کو اعلیٰ معیار کے ساتھ آگے بڑھانا چینی طرز جدیدیت کو فروغ دینے کا لازمی حصہ ہے، جبکہ اس کی بنیادی سمت اور کامیابی کا معیار ہمیشہ جنگی صلاحیت ہے۔
انہوں نے زور دیا کہ بتدریج اسمارٹ ٹیکنالوجی پر مبنی عسکری نظام تشکیل دیا جائے، تربیت اور جنگی تیاریوں کو مضبوطی سے آگے بڑھایا جائے، اور قومی خودمختاری، سلامتی اور ترقیاتی مفادات کا مؤثر تحفظ کیا جائے۔
شی جن پھنگ نے مزید کہا کہ مربوط قومی تزویراتی نظام اور صلاحیتوں کو مضبوط بنانا قومی دفاع اور مسلح افواج کی جدیدکاری کو اعلیٰ معیار کے ساتھ آگے بڑھانے کا ناگزیر راستہ ہے۔
