جنوری 2024 میں، 5 سالہ فلسطینی بچی ہند رجب حماد اور اس کے اہل خانہ کی گاڑی کو غزہ شہر کے قریب اسرائیلی دفاعی افواج کے حملے میں نشانہ بنایا گیا، جس پر شدید بین الاقوامی ردعمل سامنے آیا تھا ۔ حال ہی میں اسرائیلی دفاعی افواج نے اس واقعے سمیت متعدد واقعات کے جائزے کے نتائج جاری کیے ہیں، اور اعتراف کیا ہے کہ ہند کی گاڑی پر حملے کے واقعے میں اسرائیلی فوج نے فائرنگ کی۔ ساتھ ہی اس کیس کی مجرمانہ تحقیقات کا فیصلہ بھی کیا گیا ہے۔ تاہم ہند کی دادی سمیت متعدد فریقوں کا کہنا ہے کہ انہیں اسرائیل کے عدالتی نظام پر بھروسہ نہیں ہے، اور اس طرح کی تحقیقات میں ایسا کم ہی ہوا ہے کہ ملزمان کو سزائیں ملیں ۔
اسرائیلی دفاعی افواج کے حملے کے بعد ابتدائی طور پر زندہ بچ جانے والی ہند نے فلسطینی ہلال احمر سوسائٹی کو فون کر کے مدد مانگی تھی،تاہم مدد کے لیے آنے والی ایمبولینس پر بھی حملہ ہواتھا جس کے نتیجے میں ہند کے ساتھ تمام افرادسمیت مدد کے لیے آنے والے دو طبی کارکن بھی جاں بحق ہو گئے تھے ۔
